【異動尋寶】悶市去到爆邊時刻…(魏力)
過去兩日,港股成交分別係437.6億元及447.5億元,扣埋衍生工具成交,每日股票成交僅約300億元;而單計騰訊(700),每日就有近20億成交,佔比約6%。以全日市交易時間330分鐘(上午150分鐘,下午180分鐘)去計,平均每分鐘成交額只有1.3億元,再扣埋頭尾5分鐘的幾十億complete order成交,每分鐘得番唔夠1億,呢種程度的悶市,除了平安夜、除夕半日市之外,真係好耐好耐無見過。如目前閣下仍有每日留意股市,已算是港股忠實fans,絕對值得畀個like。
炒開股都知,個市悶到一個點,就會爆邊(即係爆升或急跌),是暴風雨前的平靜?抑或晨曦前的黑暗?筆者估計向上的機會稍高,但別期望有1,000點以上的升浪,有500點就很不錯,原因係沽空日日都計息,恒指停在19500至20000已經5日,又無特別因素再推落去,都會傾向先平部份淡倉,鎖定部份利潤之餘,亦可減低心理壓力。
不過,港股個底子弱過弱煲,經濟又急速轉差,在無特別大利好消息之下(如人行大開水喉、美國推遲加息等),只要彈三幾百點,已經千萬沽盤湧出來食糊減磅,淡友又會再沽期指開淡倉,博食下一個跌浪,實在無條件推上去,否則就唔會有咁多股票私有化回歸A股了。
不過,昨日港股都有個略為利好的消息,《華爾街日報》引述接近人行的消息指,3月份一場閉門會議上,有經濟學家與銀行官員們呼籲人行停止與市場對抗,允許人民幣貶值時,人行官員就話,當前首要任務是維持穩定,仲暗示中央對人民幣市場化的政策方向漸失興趣。需知道人民幣國際化是A股全面開放的基礎,如果人仔開倒車,A股就仍然係半封閉市場,港股就仲有幾年可玩。他日A股全面開放,港股還有甚麼優勢?