【百萬Blogger】學習高手思維（財叔）

早前在iMoney的Facebook睇到陸東先生做直播，當中好多思維都可應用於物業投資方面，令我對價值和價格又有另一領會。

他講到現市究竟是「牛一」（牛市第一期）定「熊三」（熊市第三期），其實要事後先知，這觀點正到不得了。就如一隻股票的價值，好視乎你覺得依家是「牛一」定「熊三」，如果你覺得是「牛一」，這隻股的投資價值當然較高，相反如你覺得是「熊三」，就算你覺得隻股票幾有價值，都未必敢去買，因為之後其價格可能會更低。其實結果都係睇你估唔估得中！

他又提到，入市最好揀行業領導者和獨市生意，那物業之中甚麼是領導者和獨市生意呢？咪即係Location（位置）囉！願景？No way！

陸東又講到有關價值投資陷阱，就是不要被過往數據誤導，被價值迷惑，這是投資者應謹記的名言。

最後，他更提醒大家不要扮醒目「騰出騰入」（買出買入），真係好正！有時睇文章是學別人值得學習的思維，並非睇人家怎樣估市，中唔中其實又要事後先知。其實佢估唔中還好，如果九次中，到第十次唔中，我諗應該會死好多人啦！

一動不如一靜

早前我也在iM的Facebook做直播，回答讀者提問，但因技術問題尾段20分鐘消失了，其中一部分我想在這裏再講一次。該讀者提問，他已由香港移民外地，應否減持香港物業？這問題其實我一直也想講，但諗住無外地讀者，所以一直無寫。

其實如果過去10年有外地人或已移居外地的港人在港買入物業，無論今日樓價上升與否，在匯率上已有一定升幅，例如：加拿大元由高位跌了近四成、澳元跌三成、英鎊跌兩成等等，單是匯價已有可觀利潤，所以現在減持可能有機會雙贏。

但可惜那位讀者現居台灣，那就沒有賺匯率的優勢，而台灣房地產投資亦不是時候，因當地也有政策推出，例如減低按揭成數及增加稅率，這些也是遏抑樓市的措施，而且台灣的租金回報一直不高，如果現時減持，要考慮資金去向，會否有更高回報的投資，否則一動便不如一靜啊！

其實每個人在同一時期，投資決定也可以好唔同，就如我剛賣出一個創同區新低呎價的單位，有人知道後問我是否真係睇得咁淡？但我又覺得買家好識計數喎！究竟我蠢定係買家醒目？其實大家都在各自計一條唔同的數，下次同大家計一計啦！

作者：財叔

擁有20多年投資物業經驗，見證樓市高低起跌，1997年金融風暴、2003年沙氏谷底、2008年金融海嘯，均成功管理風險安然度過，要訣是識得計數。昔日廢青，會考兩科合格，目標明確，如今未足50歲達致財務自由，辭工追夢，助人助學，希望可啟發更多財務自由人，找到心靈富足。本欄所得稿費，全數捐贈慈恩基金會作慈善用途。（本作者文章隔周刊出）