【百萬Blogger】最後機會（財叔）

估唔到我出最後一篇文前一日，又係政府出招，連日被問及係咪有內幕消息，為免被人誤會，我必須寫多一篇澄清下，唔係一陣隨時被人請飲咖啡！哈哈！

其實政府再出招係遲早的事，呢個亦都係我早兩年話住宅已經無投資價值其中一個原因，雖然呢兩年樓價仍然係咁升，但我一直無改變過諗法同做法，繼續減持住宅，因為我堅信，同政府對着幹係無好結果！而且依家回報咁低，亦都唔值得去投資住宅，所以順便趁機優化我組合。

愈出招愈升 買家怕執輸

當我知道話出招一剎那，我就替首置人士高興，因為之後會少了一批投資者同佢爭；而租金亦因為部分業主轉賣為租後令供應增加而有機會下調。發展商定必回賺印花稅，故未來將會是一手盤主導。當晚iMoney問我對辣招有咩意見，我亦表明那晚是投資者「最後機會」，如果業主遇到投資者客就可以企硬，如果首置客想買樓就可以鋤深，因為第二日買家會更少。

但原來真係非我所想！我有朋友當晚把單位以創新高價及比銀行估值高5%賣給一對首置夫婦，而另一個首置朋友亦在沒有再議價的情況下，於當晚簽約買樓！那一刻我立即想起小時候的一個故事：狼來了！可能因為過去咁多次都係愈出招愈升，所以佢真係驚會再升，如果唔係無理由唔留住張王牌慢慢用，不過其實如果係首置而又有自住需要，買都應該係好事，因為年頭跌市都唔買，真係可能無乜機會再買。而我就慶幸早前售出一個大額物業，於出招當日收埋大訂放心晒！唔係之後都唔知有無人會比高估價50%同我買！更好彩我又同一時間以低於之前成交價買返工廈，如果唔係一陣個投資鐘擺又擺到去非住宅物業又無得買啦！

專家推REITs 瞓身變輸盡

好啦！今次真係最後一篇啦！又等我做埋最後一次醜人啦！

早前有好多人推介REITs，問我有咩意見，話聽人講前境好，無風險，其中一隻新加坡REITs更被神化，我當時回答佢好簡單， 就係REITs咪又只係股票一隻，我睇唔到點解會無風險，當時人梗係笑我無料到啦！個個專家都話紙磚頭好過實磚頭，咁我咪惟有認衰啦！如果唔係一陣又叫我專家咪死！你知專家要食咩㗎啦？！

不過好在上天係公平，有些叫人瞓身的專家都受到應有懲罰，呢隻REITs由年初約0.9元升到約1.1元，而有專家亦大手在大約1.08元入貨，如果以現時市價0.95元計，都唔見10%以上，再如果跟佢教人做盡槓杆的話，宜家都應該就快輸晒，所以唔好聽人話無風險就去「槓到盡」。當今年年初低價利用槓杆入市，到年中當然意氣風發啦！但到依家唔知重笑唔笑得出呢？只係贏過未輸過的專家，你信佢真係隨時食X㗎！

要記住：刀刃有兩面，可救人亦可殺人﹗珍重！再見！

 

作者：財叔

擁有20多年投資物業經驗，見證樓市高低起跌，1997年金融風暴、2003年沙氏谷底、2008年金融海嘯，均成功管理風險安然度過，要訣是識得計數。昔日廢青，會考兩科合格，目標明確，如今未足50歲達致財務自由，辭工追夢，助人助學，希望可啟發更多財務自由人，找到心靈富足。本欄所得稿費，全數捐贈慈恩基金會作慈善用途。（本作者文章隔周刊出）