【股劃有道】牛市玩完？（畢氏財演）

上證指數半個月由5,000點樓上調整到3,700點，差唔多唔見四份一，市值蒸放照過二萬億人民幣，阿爺今次真係出足十二面金牌都未抵得穩個市，立時所有陰謀論都浮出水面，一時真係話外資造空A股，一時就話美國發起的金融戰爭，一時又話係國家內部鬥爭，謠言滿天飛，我真係想學田少講句，邊有咁多陰謀論啊。

可以提出咁多理論出黎，好明顯大部份人都未明白內地市場的遊戲規則。首先，大陸唔同香港，內地係散戶(或者大媽)主導，每日成交90%以上都是散戶的交易，散戶炒股靠什麼？消息。曾經有散戶問過，上午他以100萬元買入一隻股票，下午該隻股票立時有大量資金追入，他問係唔係有大戶入市，當我睇返啲紀錄的時候，下午入市的全是散戶，呢批散戶都當左上午以100萬元入市的人兄做大戶，跟大戶買貨。可見消息、羊群效應先至係推動A股上升的主因。羊群效應使到個市升得急，亦跌得快。

其實當局都應該知早前出招去槓桿化的行動玩大左，今次救市的措施既急且狠，相信等班散戶驚完後，理性返少少，個市可望回升。但係由於當局去槓桿化的影響，預期呢個牛市真係會進入一個慢牛階段，唔好預期會再好似前段咁急升。

睇返恒指個圖，由23,500升去約28,500，今次調整返約3,000 – 3,500 點，約升幅的2/3，而250天平均線亦約在相約的水平，相信大市的調整應該差不多完成，但可能會進入一個大波動的上落市。