【股壇衝鋒車】兩年大炒一劑的超值股（周沖）

今日唔講大盤，直接入正題，昨天推介的連達科技(889)上升9%，周沖不敢居功，因為市場實在有不少呢類禾桿冧珍珠的超值股，所以，今日繼續走超值細價股路線，就係從事半導體分銷及創投業務的AV CONCEPT(595)，由於此股每隔兩年便上演一場大龍鳳，數數手指2015年還有2個餘月便過去，似乎又係落注博倍升之時也。

AV CONCEPT大股東蘇煜均屬低調廠佬，20年前已成為三星電子的香港及星馬地區之分銷商，多年來公司業績多數係賺兩年蝕一年的景況，惟公司股價卻有一個慣性，就係每隔兩年便大炒一劑，唔係齋炒而係星光熠熠地大炒。首先係2010年，公司引電盈(008)老闆李澤楷入股，股價4角多炒到2011年的2元才見底回落，一年狂升4倍多。到了2013年，蘇煜均又發功，引入私募基金CVC話事人梁伯韜持股逾5%，AV CONCEPT股價由4角起步炒上1.30元，又係倍倍聲爆升。

買AV CONCEPT其實就係相信蘇老闆引入勁人的超強能力，今次到底引入什麼勁人或者有何利好消息，周沖並無水晶球，不過單由公司的基本面睇已非常值博。首先，AV CONCEPT昨收報0.373元，市值僅2.8億元並持1.3億元現金，周沖昨天講過，目前主板殼價已升至6億元，買AV可當殼股來小注投資。

其次，AV CONCEPT每股資產淨值高達0.835元，現價大幅折讓55%，真係平到笑，同樣係做電子產品分銷的偉仕(856)的PB係0.83倍，AV的PB若與偉仕睇齊，股價可見0.70元。

最後，AV CONCEPT創投基金投資了韓國手機遊戲商Me2on約23%股權，去年收入逾1億港元，公司早前已透露委任了投資銀行搞上市事宜，一旦成功上市，對於市值不足3億的AV CONCEPT來說，肯定帶來一筆豐碩的特殊收益。該股昨天由低位抽升10%，不排除有好消息跟尾，無論貪平買入等升回合理水平，抑或博其分拆快有好消息公布，現價都可小注上車，等蘇老闆表演每隔兩年的好戲。