【股壇衝鋒車】永勝醫療咪睇漏（周沖）

大市以為北水一停就會回，點知只係量縮，重因為油組減產消息一早炒高2百幾點。但始終都係高開低收，呢個星期大價股既話，周沖都係建議有高開就食一食先，分分鐘即市都買得番。將個焦點放番係細價股上面，今日周沖又為大家帶來一隻細價半新股---永勝醫療 (01612)。

永勝醫療(01612)係做醫療設備，主要收入來源為OEM業務，為客戶製造各種醫療器械，包括呼吸產品、造影劑壓力注射器一次性產品以及骨科支護具康復器具等，主要客戶包括國際著名藥廠。公司亦以自有品牌「英仕醫療」開拓OBM 業務，主要開發、製造和銷售呼吸設備、一次性產品和骨科支護具康復器具。

其公司1997年開始做起，算係低調發大財既股票，上市時股市麻麻地超額得30幾倍，實在生不逄時。周沖睇番，原來呢隻都係一隻好股黎。首先講番佢既業績。岩岩公布左到6月為止既上半年業績，錄得營業額2.38億元，按年增加6.4%；毛利7792萬元，上升14.9%。純利1214萬元，倒退44.9%，每股盈利2.53仙。不派中期息。減番上市費用1600幾萬，其實應係有增長，同一般啤殼上市，一出業績就見紅既好唔同。

再者，之前上市用下限$1蚊定價，依家重潛緊水10%，市值都未夠6億。如果用上限價計數有3成水位。見到佢呢2日都收枝陽燭仔，咁岩呢幾日D半新股又起動，不妨小注係0.9附近買入，搏佢先升番穿1蚊IPO價，目標係招股上限$1.25啦。

買入價: $0.9 目標價 $1.25 止損價: $ 0.8
周沖

http://www.facebook.com/chowchung123
chowchung123@yahoo.com.hk