【股壇衝鋒車】電競股首選聯眾(周沖)
美國一如所料沒有在大選前加息,但港股虎頭蛇尾,早上一舉上試24000點。上午天堂下午地獄,差不多化哂朝早既升幅。昨日港股通既資金又由流入變左流出,戰友們都要忍下手,應該會有一個比較深既調整先再有機會上試今年高位。
呢排股市講緊比較強都係科網股,先唔講宇宙最強既騰訊(0700),遊戲製造商IGG(0799)唔夠一個月升左成3成有多,可見之後既大趨勢都係圍繞著呢個主題。無他,睇下新聞,宜家打機都可以做事業,電競行業係一隻金蛋,今日周沖想講一講既股票就係聯眾(06899)。
聯眾(06899)是中國領先的在線棋牌遊戲開發商及運營商,擁有強大品牌做線上線下業務。德州撲克應該大家都唔會陌生,身為機不離手既周沖當然都有玩。以前打機,贏左既錢又拎唔走,但依家既電玩有國際性比賽,獎金都數以百萬計,真係毒男都有出頭天。
睇番條數,半年賺左7800萬人仔,升左21%,可見呢種線上線下一條龍既供應商商機處處。今日剛升穿250天線,亦剛剛升穿出半年業績時的高位。但比起一年高位重有4成幾水位。買股買前景,呢隻坐5望6無難度啦!
周沖