重奪「煮權」 打贏儲蓄消耗戰

飲食App持續有新力軍加入，飲食雜誌又長賣長有，可見香港打工仔外食比率一定甚高，但甘願放棄「煮權」，只會令自己長期陷入儲蓄消耗戰。

「無飯家庭」高成本低效益

理財文章不時強調打工仔想學習儲蓄，第一步是戒掉每朝到連鎖咖啡店買咖啡的習慣。但比起「無飯家庭」買外賣或外食開支，這杯咖啡消費就顯得濕碎。

英國BBC早前調查當地五千名成年人，發現16至24歲受訪年輕人平均每星期食物開支約750港元，其中外食及外賣開支分別為333港元及231港元，較受訪成年人多64%及73%，年輕人收入一般較成年人少，單是維持「無飯家庭」已令他們食到窮。

香港情況其實大同小異，不少年輕夫婦或情侶長年維持外食或買外賣習慣，即使慳慳地只幫襯快餐店或茶餐廳，每餐使費約120元至200元，加上每星期可能會有一兩餐食好啲，涉及使費閒閒地四、五百元，一個月單是外食便花掉至少六千元，全年因為懶煮飯，就白白進貢7.4萬元予本地餐飲業，足夠購入六手盈富基金。

或許有部分較高收入的年輕打工仔會認為外食是減壓良方，但天天外食可能要付出沉重的醫療代價，一些習慣天天外食的打工仔，年過30就有高血壓、心臟病甚至糖尿病等手尾長毛病，元兇就是經常外食攝取過多油、鹽、糖。年輕打工仔唔想將來要為外食帶來的健康風險埋單，就要決心撇甩「無飯家庭」的生活。

三管齊下 掌握「煮權」

BBC的調查指出年輕打工仔平均只懂得煮四款食物，因此只好依賴外食醫肚。香港打工仔長年外食，除了因為唔識煮，另一關鍵原因是無時間。要解決此問題，就要從三路入手。

唔識煮又無時間，起步時可以利用周末時間完成平日烹調的前期工作，例如適合煮食初哥的意粉，除了選用市面現成的意粉醬，趁周末按食譜用新鮮蕃茄煮定一個香草意粉醬，既可以用來煮意粉，亦可以用來煮海鮮或扒類的拌汁。智能飯煲及電炆鍋都設有多種烹飪程式，參考廠商提供的食譜，煮食初哥亦可以在周末預先烹調炆菜或燉菜，放工回家只要炒一個菜或焗一塊魚柳便可以開餐。

第二點是切忌一步登天，不少烹飪初哥起步時會先挑戰自己喜歡的食物，但好味不代表易煮，要避免連續失敗重挫學習烹調士氣，就應該先學習烹飪書或手機App提供的入門簡易食譜，成功後再逐步挑戰難度較高的菜色。

打工仔未必每個周末都有時間準備一周食物，又或想利用即日新鮮食材準備晚餐為自己打氣，可以考慮交由家務助理採購食材。參考家務助理中介人的套票計劃，30小時服務計劃收費2340元起，服務包括採購及準備食材。不少家務助理本身是家庭主婦，在烹飪上有豐富經驗，在挑選食材及準備工夫上有一定保證。假設家務助理每星期五天為打工仔採購食材，還有若干工時剩下負責家居清潔服務。此策略雖然付出一筆額外使費聘用家務助理，但相對天天外食，仍可以節省伙食支出，有助擺脫食到窮困境。