紫金礦業 (2899.HK)

【財經TOP SEARCH】藥明生物有貨唔想沽預咗要捱價

【Now財經台】截至早上11時止，1小時內《彭博》用戶關注度上升最多港股，依次為藥明生物(02269)、港交所(00388)、紫金礦業(02899)、比亞迪股份(01211)及騰訊控股(00700)。 藥明生物今日(5日)復牌股價繼續插水，雖然集團出通告指業務營運維持強勁勢頭，但仍被券商降目標價及評級，部分券商指股價再跌空間唔多，長遠仍睇好業務表現，有信心集團可以應對今次挑戰，但似乎挽回唔到投資者信心。富途證券高級策略師譚智樂認為，今次唔算係發盈警，焦點反而係公司前景，因為未來增長將會放慢，主要係疫情帶來高基數效應，但市場擔心以依家內地嘅經濟狀況，甚至整個行業，未必可以繼續支持高增長，即使管理層指引都唔足以支持咁高估值，所以問題唔係基本因素，而係估值需要下調。佢又指，藥明生物股價跌穿30元，預測市盈率(PE)約27至28倍，若市場認為整體生物科技行業未必再有高增長，甚至只得單位數增長，呢個PE仍有殺傷力，所以短線就唔好估底，但中長線嚟講，隨著明年宏觀經濟環境好轉，估值仍有條件提升，但短期可能仍有恐慌性抛售、超賣等風險，如果有貨又有信心，可以考慮繼續持貨捱住先，但就唔好隨便博反彈。