【專家分析】聯儲局明議息!美股唔驚加息除非...
【Now財經台】美國聯儲局明日起一連兩日議息,睇返對上兩次議息後美股嘅表現,5月初加息0.5厘後,美股喺半個月內累跌逾10%,不過,6月加息0.75厘後,美股反而喺低位反彈近10%,市場係咪已逐步消化加息因素,只要單次加息唔超過0.75厘,都唔會對美股構成好大衝擊?
星展銀行(香港)豐盛私人客戶執行董事鄧威信指,市場已預咗今次會加息0.75厘,6月議息前兩日已有消息流出,指聯儲局會加息0.75厘,當日美股都幾波動,由於市場已充分預期今次加息0.75厘,只要到時唔係加息1厘,相信美股市況會比上次更穩定。
Wilson又話,依家市場開始關注9月仲需唔需要加息0.75厘,估計喺呢段期間,美股市況會比較波動,後市主要係睇住通脹數據,同埋通脹有冇見頂回落嘅跡象,如果開始降溫,金融市場就會穩定返,相反,如果通脹持續高企,美股波動性一定會加劇。