【專家分析】香港科技探索食完疫情紅利?
【Now財經台】香港科技探索(01137)交代咗去年12月營運數據,12月每月平均每日訂單總商品交易額(GMV),按月同按年都只有單位數增長,公司全年GMV為65.7億元,甚至未達到公司設定嘅目標下限,公司解釋,係同本港零售業復甦緩慢與競爭激烈有關,究竟係咪真係咁?
新城晉峰金融集團分析員莫灝楠指,雖然公司表現同目標下限唔係差好多,但因為市場會跟返公司嘅指引去計估值,所以唔達標一定會對股價有影響。香港零售市場競爭大係必然,因為香港好方便,唔會第一時間諗網購,所以市場一定唔會有國內、外國咁大,因此喺香港做電商會比較困難,加上香港科技探索營運模式係一個平台,向商家收取上架費、手續費,然後幫手賣商品,技術含量相對低。
Casper又話,香港科技探索屬疫情受惠股,喺早排香港疫情緩和、大家適應返相對正常嘅生活下,公司表現一定會受影響。