【股市脈搏】新東方「絕地反擊」後未脫險?
【Now財經台】市場擔心內地收緊K-12校外課程監管,但午後北京當局否認傳聞,專做K-12校外課程,今朝跌到一仆一碌嘅新東方(09901)午後絕地反擊。
新東方今朝裂口低開近14%後,一度低見70.8元,大跌逾15%,創新低,午後大量買盤撈底 ,帶動股價一度倒升逾7% 高見89.5元,單日高低波幅逾20%,成交股數較過去100日同時段平均大增逾10倍。
雖然官方否認傳聞,但喺中央希望借減輕家長壓力,以提高生育率嘅背景下,收緊校外課程政策或者陸續有來,新東方股價短期都未必可以大舉收復失地。