【股市脈搏】李寧2022年開壞頭
【Now財經台】北水噚日回歸即掟貨,今朝北水暫時錄得淨買入,股價噚日大跌逾7%嘅李寧(02331),雖然淨買入8700萬,但股價今朝繼續跌,一度低見76.4元,跌逾3.3%,下試250天線及50周線,其後跌幅收窄。
內地疫情反彈 ,加上李寧去年上半年受惠於新疆棉事件,喺內地民眾支持國貨嘅熱潮下造就咗高基數,今年上半年業績要維持高增長自然有難度,要等派全年成績表先知Q4業績係咪交到貨。
李寧係去年藍籌「升幅王」,踏入2022年股價持續調整,後市要睇實守唔守到好關鍵嘅50周線,暫時北水仍持倉9.4%。