【名家給力場】分注買貨長揸贏面大
【Now財經台】港股今日一度瀉逾1000點,連2020年嘅「疫情底」21139點都穿埋,下晝市況略為喘定,曾經上返21200點,大市咁樣跌落嚟,係咪純粹因俄烏戰事?恒指已自2月中高位回落咗約4000點,依家市帳率(PB)0.87倍,市盈率(PE)喺9倍樓下,市場成日話PB跌破1倍,大市就應該差唔多見底,呢個指標仲係咪咁有效?
《香港股票財技密碼》作者梁杰文指,港股今日大冧,除咗俄烏戰事,亦因為香港市道唔好,零售及食肆嘅經營情況都好差,市面好冷清,加上月底會做全民檢測,到時又有機會停工停市,呢啲因素加埋就推低大市。至於睇PB目前嚟講仲係有效,從基本因素角度出發,PB低過1倍,依家入市買盈富基金(02800)都係安全。Mike又話,依家恒指成分股中,多咗一批科技及新經濟股,而呢啲股份嘅PB係比平均高,喺咁嘅情況下,恒指PB都可以跌到0.9倍樓下,依家作中長線分注吸納,不論值博率及勝算都係非常高。