【專家分析】聯想績後冧價「四宗罪」
【Now財經台】聯想集團(00992)中午交咗份靚業績,季度純利及收入齊創新高。截至9月底止,聯想中期多賺87%,派中期息8港仙,第2季度就多賺65%,好過預期。盤數睇落都好對辦,但聯想午後跌幅擴大,仲係表現最差嘅科指成分股。
艾德證券期貨聯席董事陳政深指,聯想盤數其實幾靚仔,但股價喺10月已經跟大市升咗上去,而且已升到之前嘅裂口位,其實喺資本市場股價唔單止係反映業績,其次係硬件如Notebook係聯想最大嘅收入部分,喺環球市場仍然係一哥,所以市場會特別關注公司嘅增長,如果睇返一啲交付量數字,增長係低過Dell等同業,亦唔係錄得一個好顯著嘅增長,所以呢方面係有啲蝕章。佢又話,仲有一點要考慮,就係供應鏈會唔會出現斷層?此外,聯想喺一啲高毛利市場增長係放慢咗,喺種種因素下,趁好消息出一出貨係無可厚非。