【專家分析】騰訊、港交所股價暫難有起色
【Now財經台】騰訊控股(00700)及港交所(00388)噚日都失守過300元關口,其實兩隻股份都傳出正面消息,前者旗下騰訊音樂將以介紹形式,下星期將會喺香港第二上市,後者就研究降低科企上市門檻,滿足產品商業化仍處於早期階段嘅大型科企融資需求,兩隻股份後市係咪應該可以企穩3字頭?
東亞銀行財富管理部首席投資策略師李振豪指,睇返整個恒生指數走勢,一啲大型成分股走勢其實冇明顯改善,除非部分政策為支持平台經濟逐步放鬆,否則,唔好奢望科技股或個別手遊業務短期內可重返高位。
至於上市條例,李振豪就話,港交所過去一兩年開放S股、B股等,但股價表現反映市場唔受落,香港要繼續成為全球IPO集資前列份子亦較難,加上踏入下半年港股成交金額比上半年更淡薄,要等資金再重新流入港股,港交所股價先會有起色。