香港股市 將在 29 分鐘 開市

【星級理財】鄧一君大講生意經 分享《一君士多》創業理念

嚟到下集,鄧一君會分享佢嘅創業夢。

佢話自己不嬲都有興趣做生意,對食又情有獨鍾,所以決定開餐廳。但佢開餐廳嘅目標唔係賺大錢,而係想同人分享自己鍾意食嘅嘢,從中取得滿足感。基於呢個理念,餐廳改名叫「一君士多」,而唔係「一君車仔麵」。因為如果舖頭叫「車仔麵」,俾人感覺太專注;但叫「士多」就好似咩都有,俾人感覺好方便同好大眾化。

之後,鄧一君分享舖頭嘅營運實況。佢話自己專注喺食物出品,而拍檔就負責宣傳包裝。佢話曾經睇過一本書叫《富爸爸窮爸爸》,自己都好認同書入面所講嘅系統管理。除此之外,佢覺得創業之前一定要先計數,唔能夠話賺得幾多得幾多,一定要有目標,有需要時作檢討。還有,佢覺得用嚟創業嘅錢最好係閒錢,唔好拎晒啲血汗錢嚟孤注一擲。

喺呢一集,佢仲分享自己點教囡囡理財。佢話,小朋友一定要學識分「需要」和「想要」。例如,好多小朋友都鍾意《星夢學園》,但呢啲唔係必需品。佢仲話作為爸爸,唔好成日諗養大一個小朋友要洗幾錢,最重要係諗清楚自己想俾啲咩佢。佢就只係俾囡囡學畫畫和彈琴,呢兩樣嘢都係小朋友嘅興趣。佢話無安排小朋友補習,只係要求佢上堂留心啲,返屋企識做功課。

最後,佢仲分享咗自己嘅理財心得,就係將錢分為4個部分,要買需要嘅嘢,之後係想要嘅嘢,仲要有慈善捐獻和儲蓄,咁先完滿。