楊紫瓊被楊潤雄稱為港演員惹爭議 FB感謝香港與內地
馬來西亞華裔女演員楊紫瓊憑電影《奇異女俠玩救宇宙》奪金球獎音樂喜劇最佳女演員,文化體育及旅遊局局長楊潤雄祝賀楊紫瓊之餘,又叫佢做「香港演員」引起爭議。 楊紫瓊喺Facebook發文,感謝各界嘅支持,佢話,感謝國家元首、首相以及部長們,仲有香港同內地嘅大家庭,佢話,依度係佢作為演員嘅開始,令佢走到今時今日。 香港有人諷刺楊潤雄叫楊紫瓊做香港演員,有「認親認戚」之嫌,大馬亦有人唔同意香港沾光,但亦有大馬網民認為,楊紫瓊喺香港發跡,叫佢做香港演員都唔過份。 今年60歲嘅楊紫瓊喺馬來西亞出生,擁有法國國籍,佢喺香港出演多部電影,包括《皇家師姐》、《警察故事3》等,打起名堂,之後出演《卧虎藏龍》,成功打入荷里活市場,亦變咗做國際華人女星嘅代表。