【股市脈搏】小心雷蛇私有係流料
【Now財經台】今日中午前,已有春江鴨出動,掃高雷蛇(01337)股價,《路透》喺港股中午個break期間爆料,話由公司高管合組嘅財團,計劃以每股4元私有化雷蛇,相當於公司估值350億元,雷蛇股價近5年都未見過4元,招股價亦只係3.88元,消息一出,雷蛇股價午後升幅擴大,一度高見3.1元,升逾22%,但升幅好快已縮咗一大截,之後維持約10%升幅。
雖然雷蛇午後成交異動,但公司冇停牌,暫時亦冇發澄清或其他通告,下晝跟風上車嘅投資者要小心控制風險,因為近年有好幾單《路透》獨家嘅私有化報道,好快就遭相關公司否認。