【股市脈搏】百富復牌曾再插 有資金買返上去
【Now財經台】百富環球(00327)上星期三喺大成交下急瀉,之後中途停牌,今朝復牌大幅低開20%,開市報4.3元,係暫時即市低位,亦係舊年10月尾以嚟低位,但好快就有資金流入買返上去,跌幅不斷收窄。
百富美國子公司喺佛羅里達州嘅office,上星期畀FBI突擊搜查,之後百富出通告交待事件,話FBI、海關、邊境保護局官員,喺佛州office、倉庫搜查時,攞走部分物品,又同公司同事傾過,但集團唔知主題事項或目的,而發布嘅聲明亦冇對集團提出相關指控,依家美國子公司運作已回復正常。
百富話,依家終端機業務佔舊年收入只係0.25%,影響好有限,但始終涉及到FBI,難免影響市場信心,需要時間去淡化事件,後市要留意FBI有冇進一步行動。