【股市脈搏】虎都午市暴瀉後再後抽
【Now財經台】虎都(02399)股價連升6日,今朝創過6.1元新高,下晝突然一度洗倉式急瀉82%,短短幾分鐘內由6元水平暴瀉至1元,之後再大幅抽升,一度倒升逾2%,上返5元樓上,成交股數較過去100日同時段平均增約7倍,暫時成交金額超過6億元。
虎都舊年購嘅公司洪高,同京東集團(09618)子公司簽合作協議,可以喺內地廣告媒體、內地線下店舖用京東嘅商標,泊到呢個大碼頭一定係利好。
虎都股價喺4月開局短短幾日,用今日即市高位計,累升55%,今日下晝喺低位買返上嚟,後市要留意有冇消息跟尾。