著名作曲家顧嘉煇離世 享年92歲
香港著名作曲家顧嘉煇琴日喺加拿大溫哥華離世,享年92歲。顧嘉煇被稱為樂壇教父,佢喺70至80年代創作出無數名曲,提振廣東歌地位,更同已故著名才子黃霑多次合作,創出多首不朽名曲。 顧嘉煇1931年喺廣州出生,有一姐一弟,姐姐顧媚係著名歌手及演員,歌曲《不了情》嘅原唱者。佢從小同埋家姐一同學習音樂,1961年參加邵氏嘅作曲比賽,創作出處女作《夢》,70至80年代係佢嘅創作巔峰期,作品包括《萬水千山縱橫》、《忘盡心中情》、《親情》等,其中佢同才子黃霑合作,創作出《獅子山下》,成為香港不朽名曲。 顧嘉煇90年代開始淡出,專心於繪畫,曾喺香港舉行畫展。佢一生獲獎無數,舉行多個慈善演唱會,到2018年,重返溫哥華過退休生活,直至琴日離世。