Tesla跌落76米懸崖 車上四人奇蹟輕傷 駕駛卻被控謀殺
美國加州一架電動車Tesla跌落76米高嘅懸崖,雖然車身嚴重損毀,但車上坐喺前座嘅兩個人竟然只受輕傷,另外,兩名坐喺後座,分別4歲同埋9歲細路更加無受傷。不過司機事後被警方控告謀殺。 事發地點係北加州聖馬刁郡一號公路,當地又被稱為魔鬼坡,當時Tesla懷疑嚴重超速後,失控從公路跌落山崖,並卡喺岩壁之間,就差幾米就跌入大海,有目擊者報警,救援人員趕到,救起車上四人。 42歲嘅男司機被警方控告謀殺及虐兒,有網民就認為係奇蹟,有人亦大讚Tesla,認為投資嘅決定無錯,因為依架係最安全嘅車。