爆一爆|特朗普上場 股市亂世 黃仁勳日日掟股票(Louise)
特朗普遇刺後,搵紗布包住隻耳仔,再浦出來做騷,真係好睇過「飛黃騰達」,簡直用佢嘅身體語言同拜登講:「You’re fired !」
黃仁勳日均套現千五萬美元
槍聲之下,市場當正特朗普係總統,美股即步入消息市。市傳美國將向盟友施壓,要求收緊對中國晶片貿易,週三晚半導體股應聲插水,閒閒地跌6-7%。今年揸住隻股王英偉達(NVDA)的友人,一早來電大聲呻:「呢鋪真係亂過亂世佳人喇!」他的愛股一晚插左6.64%,「周街都係賺錢貨, 我都要掟咗佢先,寧願用accumulator 兜返貨。黃仁勳揸住3.5%嘅股份,都不斷掟貨。」友人猶如驚弓之鳥,對此愛股之口風一個月之間來個180度轉變 。
觀乎由美國證券交易委員會(SEC)披露嘅文件,黃仁勳個人持有嘅 7800多萬股,自6月中起日日掟貨,差不多每日固定掟12萬股,每日套現1500萬美元左右。今年3月業績公佈時,其實佢老哥都已有套出貨計劃,講明出年3月底前最多出貨600萬股(一拆十後),即是要有秩序地出哂呢批貨,起碼都要50個交易日。可以預見陸續有來,但股民嘅貨同黃仁勳嘅貨有別,佢老哥係拆細前以行使價$4美元嘅認股權攞返來的,基本上冇乜成本。
記得黃仁勳6月初去到台灣,同台積電老細張忠謀等人,在台灣巡迥做騷,將半導體股高唱入雲,騷後Nvidia股價曾於6月18日高見近135.58美元。而6月13日起,黃仁勳就起動出貨,差不多日日掟,到目前為止巳套現3.3億美元 。
侵侵家族生意捱到氣咳
特朗普坐定粒六做下一任美國總統,市場又開始炒減息。今年初普遍市場預期美國五月減息,小妹都揸住些少美債搏佢減息債價升,但如意算盤敲唔響,遲遲未見有減息空間 。
但呢鋪特朗普上場,睇返佢家族檔生意,The Trump Organization 旗下盡是磚頭如寫字樓、酒店、住宅及哥爾高球渡假村,係過去幾年疫情及高息環境下,唔捱到氣咳就假。以特朗普嘅私心及生意佬本色,點會唔逼聯儲局大幅減息呢?等自己都有得抖下氣嘛!