太唔是何｜英國儲蓄戶口 息率大比拼｜400歲人瑞

400 歲人瑞同好多嚟到英國生活嘅香港人一樣，無時無刻都煩惱啲錢應該放喺邊度，先可以收多啲息。結果俾人瑞搵到 Yahoo Finance UK 上個禮拜五（8 月 16 日）嘅一篇文章，比較英國多種儲蓄戶口嘅息率。當然要分享俾大家啦！

英國嘅儲蓄戶口類型，同香港嘅差唔多，都係有定期活期咁，大致可分為四類：

1. Fixed rate savings account: 即係定期，存款期通常由三個月至兩年不等，只要喺存款期內唔郁個戶口唔攞錢，就可以享有高息，啱晒有筆錢唔急用但想食高息嘅有錢人

2. Easy access savings account: 即係活期，可以隨時攞錢存錢嘅儲蓄戶口，啱晒平時隨時要用錢嘅存戶，當然咁方便嘅話，喺利息方面係要有啲犧牲

3. Notice savings account: 呢種戶口喺攞錢之前，要先通知銀行，通知期通常為 30 至 120 日，極端例子有 365 日嘅通知期。如果您有筆錢想收高息，但又唔想好似定期存款咁鎖死唔用得，呢種戶口就幫到您

4. Regular savings account: 有啲似香港嘅「零存整付」戶口，但又有少少唔同：呢種戶口每個月要存入一定金額入戶口，而利息就會每年派發，直至存款期完結，存戶就可以將整筆存款攞返出嚟

重點嚟嘞，喺呢四類戶口入面，邊間銀行嘅戶口最高息呢？以下就係每種戶口嘅頭五位結果：

定期戶口方面，提供高息嘅銀行都唔係啲大家耳熟能詳嘅名字，通常都係網上銀行。最高息 5.3 厘嘅 Flagstone 係以色列 Mizrahi Tefahot Bank 旗下嘅 Flagstone 提供，排第三嘅係 5.25 厘嘅 The Union Bank of India。如果大家想幫襯傳統大銀行多啲，可以留意 Barclays 嘅一年定存，暫時都有 4.65 厘，另外 Metro Bank 同 Lloyds 都有分別 4.61 厘及 4.35 厘。

活期戶口 Ulster Bank 竟然都有 5.2 厘息，但最低存款額要有 £5,000。其實仲有啲銀行會提供「隱藏Menu」，聽聞 Santander 為精選舊客提供高達 7 厘嘅活期儲蓄戶口，Chase 嘅儲蓄戶口精選舊客亦可透過 APP 將息率加至5.1厘，Skipton Building Society 亦會為按揭客戶提供 5.5 厘嘅戶口。

預先通知提款嘅 notice savings account 最高息有 Prosper 嘅 5.5 厘，但佢嘅通知期長達 365 日！咁同做定期一年有咩分別？唔⋯⋯若果你當係做定期一年，個息都高過上面定期最高嗰個嘅⋯⋯

至於每個月供款嘅儲蓄戶口，一向出位嘅 Virgin 就推出震撼市場嘅 10.38 厘息，仲要開戶只需 £1，客戶每月存款金額無下限！佢嘅存款期係去到 2025 年 7 月 31 日，對於想迫自己儲錢嘅人嚟講，呢個戶口的確係好吸引！不過，要開呢個戶口都唔係咁易，本身要喺 2019 年 12 月 4 日開始就係 Virgin Money 嘅客戶，又或者係 Clydesdale Bank 或 Yorkshire Bank 嘅客戶先開到。

英國嘅銀行數目咁多，有傳統、有網上，好多大家都未必聽過個名，放錢喺呢啲銀行度又安唔安全呢？咁就要留意佢哋嘅存戶係咪受到 FSCS 嘅保障（全名係 Financial Services Compensaion Scheme），即係類似香港嘅存款保障計劃。喺呢個計劃下，存戶可以獲得高達 £85,000 嘅保障。而上述圖表內嘅銀行及金融機構，都係有參與到 FSCS 嘅計劃。

資料來源：Best UK savings accounts offering above inflation rates

400歲人瑞 —— 40幾歲中年漢被同事嘲笑是400歲人瑞，結果憤而出走鼓起勇氣探索英倫新世界（沒有啦！我和同事關係很好⋯⋯至少我自己是這樣認為）。在重新適應異地生活的過程中，尋找他鄉生活的技巧與生存的態度。從第一身視角分享人性的矛盾、制度的差異、文化的衝擊，真實揭露財富是如何一點一滴積累，以及真人倒錢落海的經驗⋯⋯

本欄〈太唔是何〉逢周五登場，旨在分享筆者在英國日常生活體驗，給各位多一個生活參考，相關分享不存在實用資訊（抱歉！），只反映在當時情況下，筆者遇到的真實情況紀錄，大家可以當係故仔聽，參考一下。

留言、給讚、追蹤、分享，請往Facebook專頁：https://www.facebook.com/thames400