雅虎香港財經 操盤手札記│港股破地獄 還看三件事（割柑人）
投資者，好多時候唔係investor，而係wait⋯⋯er！等（wait）乜嘢？等經濟數據、等公司業績、等破頂、等見底、等消息、等政策⋯⋯等等，總之，好多時候係waiting for the right time to invest！11月臨近，投資者等緊嘅主要有三件大事：①11月4至8日全國人大常委會開會；②11月5日美國總統選舉；③11月6至7日美國聯儲局議息（香港時間11月8日凌晨3時公布議息結果）。呢三大事件，都會擾動環球資金流向同資產價格。
美股外幣即時報價 多國新聞任睇
人大常委會議 料有國債規模
9月24日以嚟，中國連環出招救市，當中包括發行超長期特別國債，但一直未有披露相關規模。財政部部長藍佛安月中喺記者會上話：「中央財政還有較大的舉債空間和赤字提升空間。」又話：「具體資金數量安排問題，經過法定程序後，會及時向社會公開。」市場預期官方會喺今次人大常委會議，提出具體發債規模。早前市傳未來3年合共發行6萬億元人民幣國債，協助地方化債，但呢個規模實在唔夠，以地方債約70萬億計，6萬億攤分3年，1年2萬億，只夠還利息。
市場除咗關注人大常委會議，亦關注最高領導人習近平講話，睇下有乜啟示。事實上，10月17日習近平喺安徽合肥濱湖科學城考察時嘅講話，就被市場視為投資啟示。佢話：「推進中國式現代化，科技要打頭陣。」又話：「人生能有幾回搏。」翌日內地創業板、科創板應聲爆升逾10%，本港中資科技股亦爆上。話時話，習近平唔係第一次講「人生能有幾回搏」，2022年1月4日佢喺北京考察2022年冬奧籌辦備賽工作時，已講過：「人生能有幾回搏，拚搏是值得的，不經一番寒徹骨，怎得梅花撲鼻香？」
若特朗普回朝 中美關係惡化
至於美國大選同美國議息，心水清嘅讀者可能都留意到，人大常委會開會嘅日期係覆蓋呢兩件事嘅，似乎中央都在觀望兩者結果再行應對。觀乎美國債息全線重越4厘（3個月、6個月、2年、3年、10年、30年期，分別報4.65、4.53、4.11、4.05、4.25、4.5厘），中國若要保住人民幣滙率，救市空間減少。美國大選相對美國議息，前者影響比後者大，一旦特朗普回朝，對華勢將加徵關稅，中美關係勢將惡化，金融市場難免震盪，中國需要留力應付，到時股市平準基金或將派上用場。
講返港股，上周牛皮上落，高低波幅約560點，連日喺10天線（現處20539）爭持，收20590，呈旗形整固形態；交投亦見縮減，每日成交都少過2,000億元，但北水趁整固入市，全周累計淨流入365億元，係咪響應最高領導人講嘅「人生能有幾回搏」？抑或「春江水暖鴨先知」？姑勿論如何，現時人大常委會議、美國大選、美國議息，三大不明朗當前，入市搏，風險大。港股本周料將繼續整固，喺20000關至21000關上落；要「破地獄」，要待11月上旬三大不明朗因素消除。
本欄隔周一刊出
