雅虎香港財經 【母女齊選港姐】劉佩玥媽媽曾參選港姐 網民瘋傳片段再成熱話
唔少人都話選港姐喺入行捷徑，因為當選後通常都被無綫重用，被安排參與唔同嘅慈善活動亦都有份參與劇集演出及主持節目。好似2013年港姐季軍劉佩玥（Moon），入行後即被無綫重用，初出道時主要做主持，之後加入拍劇，好似喺《城寨英雄》、《幕後玩家》、《跳躍生命線》、《十二傳說》及《降魔的》系列等等嘅演出都令人留下深刻印象。其實喺劉佩玥獲得港姐季軍時，已經被爆出佢媽媽林嬌喺1985年參加過香港小姐，阿Moon為咗保護媽媽，所以都冇講咁多。直至最新一屆港姐誕生，唔少網民瘋傳歷屆港姐片段，令阿Moon媽媽嘅參選片段再度成為話題。
林嬌喺1985年參選香港小姐，當時芳齡只有21歲，一把短髮配上只有1.62米纖巧身形，再加上可愛笑容，真係幾吸睛，不過無緣晉身15名決賽。林嬌當時職業係家庭教師，志願係想成為女港督，雖然志願冇達成，但就嫁咗俾劉爸爸做幸福家庭主婦，仲誕下Moon及Moon細佬，組織美滿家庭。28年後嘅2013年，擁有甜美可愛臉龐嘅囡囡劉佩玥（Moon）同樣參選香港小姐。決賽當晚，Moon憑出色嘅發揮，成為眾人焦點而且獲得季軍，為母圓夢。
所以話「有其母必有其女」，兩母女同樣都參選港姐，為人生賺取一個美好及獲益良多嘅經驗！
