港女講日:畀蚊咬到一撻撻?即學5個防蚊小貼士
夏天為大地帶來蚊蟲,日本一名16歲資優少年,留意到妹妹成日畀蚊咬,不惜上山捉蚊、獻血餵蚊做研究,就係想搵出妹妹惹蚊原因,果然有哥的孩子像個寶!
呢位廿四孝哥哥叫田上大喜,4年前為解決妹妹畀蚊咬困擾,每星期上山捉蚊做研究,屋企養咗成4000隻蚊!起初以自己同妹妹嘅衣物做對比測試,發現蚊對於細妹對襪最有反應,關鍵原來係腳底嘅正常菌群(normal flora)含量!
原來腳部有越多正常菌群嘅人越易畀蚊咬,妹妹腳底有1279種細菌,哥哥只有428種,大喜於是建議妹妹以消毒酒精抹腳,結果妹妹被蚊咬嘅情況大大減少三分一!
其實日常生活中有好多常見物品都可以防蚊,同埋舒緩畀蚊蟲叮咬後嘅痕癢,唔想畀討厭嘅蚊咬到手腳一撻撻,記住以下幾個小貼士:
1.精油
如果你有用開精油,會知道唔同成份嘅精油各有唔同功效,茶樹精油可以解決面上粒粒,其實亦可以緩解蚊蟲叮咬帶來嘅搔癢及抗菌效果。另外薰衣草精油、椰子油都有類似作用,降低痕癢感外,仲可以消腫。不過用精油時要注意度,如果濃度過高,可能會刺激皮膚,得不償失。
2.蜜糖
可在家中製作蜂蜜水捕蚊器,只要將膠水樽切開疊高,將頂部塗黑,再用黑色紙沿樽口做出柱狀,加入用100ml水混合1到2ml嘅蜂蜜,就可以引蚊自投羅網。
3.醋
醋嘅酸性會吸引蚊,只要用一個容器裝醋,蚊就會自動自覺飛入去,由於醋味好酸,建議將容器放喺房或客廳一角。
4.檸檬汁
檸檬汁具消炎、止痕功效,被蚊叮蟲咬後,只要噴少少檸檬汁在患處,就有效止痕,平日都可以喺屋企窗邊噴檸檬汁,預防蟲蟻入屋。
5.羅勒
羅勒唔單只止用嚟煮嘢食,佢含有化學物質好似樟腦,塗抹患處會有清涼感,效果與薄荷類似。將幾片羅勒葉捏碎,再將汁液直接塗抹紅腫到地方,可以緩解痕癢。
圖片來源:NHK 1.5Channel