爆一爆｜大鴻輝無畏無懼 西環海味街起甲級寫字樓（Louise）

前幾個月同個專做大刁嘅地產經紀食飯，話題係猜猜邊家地產商會率先被銀行call loan，仲預言 ：「下半年會好精彩！」

下載Yahoo財經APP

美股外幣即時報價 多國新聞任睇

寫字樓戰線最兇險

近排各大地產佬紛紛扯白旗，多間上市地產發盈警跪低，個個老細都死狗咁款。而林健鋒上演的「嗚咽」戲碼最估佢唔到。現時地產市場最兇險莫過如寫字樓，有位家族兩代都係靠收租嘅闊佬話 ：「呢鑊同以往好唔同，係守唔到，唔係你肯減租就得，家陣係冇租客呀！燈油火蠟、差餉地租管理費，揸住個寫字樓冇租客真係喊得一句句。」而銀行忍住手唔call loan亦係驚件貨上咗銀行身甩唔到仲大鑊。

而「甲級寫字樓蟹」中環中心，日前出現個浴血成交，成交呎價1.3萬元，呎價較誠哥出貨時呎價3.3萬元大跌62%，為中、上環甲級寫字樓試咗個新低價。

同樣有「舖王」美譽嘅大鴻輝則好似無畏無懼，旗下位於干諾道西嘅一個甲級寫字樓地盤，依然如火如荼地開工。大鴻輝2018年收購多幢舊樓統一業權時，呎價去到$2.3萬，打算重建為26層高海濱甲級寫字樓，現時起咗兩、三層。

中環中心日前出現個浴血成交，成交呎價1.3萬元，呎價較誠哥出貨時呎價3.3元萬大跌62%。 (Karl Hendon via Getty Images)

千三萬買車位破紀錄

過去十年八年，大鴻輝係地產界都好響朵，唔少交易破頂創記錄。2015年為咗統一業權就以1,300萬元買入觀塘嘉域大廈地下一個車位，創咗香港最貴車位嘅紀錄；2016年就斥資12億元掃山頂Mount Nicholson 三個單位，呎價高達10.48萬元，仲以首置名義買入自住，慳番億億聲嘅辣稅。單是個車位都要成千萬，老細梁紹鴻都話個車位係計唔到數，不過自用冇辦法唔買咁話。

無獨有偶，梁紹鴻同已故鋪王波叔個孻仔鄧耀昇（波仔）都係庶出，不過大鴻輝家族就顯嚇得多，父親梁顯利喺渣甸洋行嘅買辦，係中環雪廠街嘅新顯利大厦由其長房梁紹榮家族持有，係中環收租幾廿年早已冇成本，而長房仔女都係專業人士較為低調。

大鴻輝016年就斥資12億元掃山頂Mount Nicholson 三個單位，呎價高達10.48萬元。 (ANTHONY WALLACE via Getty Images)

大鴻輝以往在地產界出手之勇猛，與波仔不相伯仲，旗下嘅地產王國有四、五間酒店、舖位、寫字樓及住宅發展，係佢灣仔英迪格酒店地下仲有個飯堂金碧軒，出名孝順嘅梁紹鴻，其母生前經常與他在此撐枱脚。

大鴻輝並無上市，個錢包有幾深真係只有銀行知。雖然呢個寫字樓地盤靠近海味批發條街，但聽講有中資機構垂青，話哂靠近西環中聯辦，咁係咪要有個premium呢？