雅虎香港財經 爆一爆｜財經演員L君 誘健身教練接的士牌火棒（Louise）
股市經歷完四日大牛市後仍有餘韻，唔少手頭冇股票嘅散戶仍然心癢癢，想入市搵轉快錢，加上銀行既定存利息又係咁落，所以金融界一啲牛鬼蛇神又起動「搵食」。
美股外幣即時報價 多國新聞任睇
健身教練拉隊學投資
近日有位前舒適堡兼PURE嘅瑜伽教練向小妹請教，問某某財經網站是否「正路」？原來佢哋一班教練聯群結隊去聽咗一個投資講座，個佈景板招牌就係用該財經網站作招倈，而講者就係所謂嘅獨立股評人L君，亦係一間名不見經傳嘅上市公司主席。
班教練俾$8000上四堂，學下點樣玩期權，捕捉下市場個波幅，希望可以一賠十揾餐晏仔。近排股市波動，聽到啲教練個個心郁郁。但期權學費非L君嘅大茶飯，戲肉係-的士牌呢種另類投資工具。
的士佬形像負面就係人都怕，政府順勢推出措施規管班的士佬，有時同的士佬吹水，佢哋都識得噏：「政府遲早引入滴滴出行，想取諦我哋的士牌，老實講俾你揾咗幾十年，仲唔益下其他人！」所以的士牌價又點會有運行呢？的士佬仲叫小妹到馬鞍山一塊爛地望一望，有唔少斷供的士在曬太陽。
買的士牌月月有息收？
投資講座上 L君向學員推介投資的士牌，話宜家市價要300萬，不過佢就有辦法可以幫學員200萬買得到。佢仲話頭幾年可以有保證嘅租金回報，近排定期息口下跌，謂投資的士牌就月月有息收咁啦。可能L君又真係有辦法同車行或銀行攞到啲斷供嘅的士牌，但又係咪咁值搏呢？
其實呢招透過健身教練去散貨，早有前科。在微訊女未出現前，金融界嘅牛鬼蛇神，也是透過「四肢發達」嘅健身教練在上堂時放股票冧把來散貨。以前細價股炒到不亦樂乎之際，喺上環有間好大型嘅健身中心，啲生意好旺，樓上有好幾家證券行，不時有「金融財俊」 落去簽單買program，一百幾十萬算是等閒，不過就係透過啲教練上 group class 時順便唱下股票咁囉 ！
當然教練自己亦炒埋一份。嗱，橋真係唔怕舊。時到今日，一班教練人浮於事，又成為金融小鱷嘅目標。老實講，的士牌個市場都係控制喺幾個炒家手上，哪有市價？正所謂你話個牌價幾多都係假嘅，成交到先至係市價，小妹投資乜都先要諗Exit Plan，即係如果落叠買個的士牌，將來點甩到手呢？
