爆一爆｜褲王楊釗 揸鑊鏟狂掃建行、工行（Louise）

聽銀行家講，中國嘅有錢人，其實對所謂家族辦公室（Family Office)唔太熱衷，始終中國人講到錢及投資同洋人有別， 都係唔信得過外人，寧願自己操刀，更枉論重金禮聘專人幫手做投資。

下載Yahoo財經APP

美股外幣即時報價 多國新聞任睇

「褲王」身家深不見底

有「褲王」之稱嘅旭日企業（0393.HK）主席楊釗，真係傳奇人物，80年代做板仔牛仔褲出口美國而彈起，之後投資寫字樓地產，手風都幾順，其身家深不見底。佢家上市公司雖然仍未離開過成衣製造業， 不過最和味嘅回報係自己揸鑊鏟，大舉掃入內銀股。現手投持有建行（0939.HK）1.1億股、工行（1398.HK）有1.28億股、中行（3988.HK）有7280萬股，而中銀香港（2388.HK）則有26.2萬股市值近15億元。 年報都清晰列出呢堆高息藍籌股嘅入貨價， 建行（0939.HK）入貨價位 $4.54、中行（3988.HK）$2.734、 工行（1398.HK）$3.9219；而中銀香港（2388.HK） $24.15。

有「褲王」之稱嘅旭日企業主席楊釗，80年代做板仔牛仔褲出口美國而彈起，之後投資寫字樓地產，手風都幾順，其身家深不見底。 (South China Morning Post via Getty Images)

今年四、五月，呢啲中特股發威，連同旭日企業嘅股價都水涱船高，由七毫子彈上去近一蚊。而公司還趁今年一月股市低迷之時，斥資1.77億元，掃入以上三家內銀股。今年初股東大會後，更進一步授權公司喺未來嘅12個月，最多分別買入4億元建行及4億元工行。

押注富力地產債賺息蝕價

今年77歲的楊釗，縱橫商界幾廿年，是虔誠佛教徒，不過從佢投資哲學，肯定是好「息」之徒，手頭這些內銀股息口有七、八厘；而除咗內銀股，旭日企業原來亦揸咗內房債，正正是近排危危乎的富力地產（2777.HK）旗下之債券，總共揸咗$4.5億港元此內房債，息率6.5厘，至去年底呢批富力債已縮水減值$1.12億，所以息字頭上都係一把刀。

呢筆內房債雖然可能「息」即是空，但透過今年初低位大舉掃幾隻內銀股，現時帳面亦賺$1.17億，冚到內房債損傷嘅。所以到頭來都係一場空，相信作為佛教徒的楊釗早已有所參透。

旭日企業持有富力地產旗下之債券，息率6.5厘，至去年底呢批富力債已縮水減值$1.12億。 (Reuters / Reuters)