雅虎香港財經 笑到最後｜香港應主辦美洲國家盃（高明）
現時喺德國舉行嘅歐洲國家盃進入最後決賽，由西班牙對戰英格蘭，緊接落嚟就係法國奧運，今年歐洲大陸冇二百幾個盛事，但係呢兩個盛事已經夠用，據經濟推測，歐洲國家盃將會為德國帶嚟10億歐羅經濟效益；奧運更誇張，研究指長遠效益達111億歐元。
美股外幣即時報價 多國新聞任睇
德國同法國兩個都係體育大國，本身基建、運動員等等嘅基礎都足夠，舉辦大型盛事有經濟效益並唔出奇，其他未發展國家參考性唔高。反而，地球上另一邊舉辦中嘅盛事更有參考價值，就係喺美國舉行嘅美洲國家杯足球賽。
雖然美國都係體育大國，但係英式足球嘅發展一向唔及美式足球、籃球、棒球等，始終有人工差距，四肢發達嘅大學生首選都係美式足球或者籃球。
今屆美洲國家杯原定主辦國為厄瓜多爾， 但是在2022年11月，厄瓜多宣佈放棄主辦本屆賽事。2023年1月27日，南美洲足協和中北美洲及加勒比海足協宣佈達成策略性合作協議，美國會主辦國這次賽事，並且會讓六支中北美洲的球隊以邀請隊身份。
配套足 兼可搞外判
由於南美10國，過去都會邀請其他國家參賽，儲夠12隊分三組，例如唔同洲嘅日本，2019年及1999年都受邀參加過，2019年亦有卡塔爾。
足球喺南美洲好多國家都自認做國技，南美洲人口達4.225億人，主辦一屆賽事，即刻吸引到4億人注目，好似今屆美國咁。
本身唔一定要喺南美搞，加上有外隊加入先例，香港政府如果要搞盛事，大可以下屆投嚟做，始終香港有啟德體育園，又有本身嘅康文署球場，選手村甚至唔使起，因為來港窮遊嘅旅客唔過夜同自己帶杯麵，10支球隊嘅酒店吉房應綽綽有餘。
大家可能會問，美國主辦都係成國搞，香港一個城市點食得晒？因為香港出名外判制度，所以投咗嚟做先，之後再判畀深圳東莞廣州等省市都冇問題。
連帶可以學今屆咁，攝港隊、澳門隊、廣州隊等加6隊友好隊伍入賽事。加上，球王美斯曾暗示今年係最後一屆踢美洲國家盃，下屆如果香港成功投嚟做，唔會有美斯，唔使篤眼篤鼻。雖然美國有美斯在陣嘅阿根廷最多人入場睇，例如分組賽人對智利人數達81,106人係今屆最多。
搞一屆大型賽事好過搞幾百項盛事，值得香港投嚟主辦。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
