雅虎香港財經 金融花生│所謂股災係老散認證課程（言平）
8月初當美國公布7月份非農新增職位再次低過市場預期，而且7月份失業率升返上4.3%，高於市場預期下，一股唱淡美國經濟衰退嘅風暴一觸即發，唔單止令到美股下跌，更加係大行鬥吹淡下，觸發埋日圓利差交易冚倉，曾令到日本股市單日急跌超過12%，跌浪更蔓延至台股、南韓股市甚至美科技股。
其中，大行中以高佬盛同細摩唱得最淡，佢地驚個市場未夠弱踩多兩腳，話日圓拆倉潮先啱啱開始，起碼仲會有超過一個月先可以拆晒啲利差交易。喺全世界陷入恐慌下，道指只用咗3個交易日已經由高位41,198點急跌至39,358，累計跌幅達到4.46%；至於反映科技股走勢嘅納指，更只用咗3日就由17,791點跌到去呢輸最低位15,708點，累計跌咗11.7%。
美股外幣即時報價 多國新聞任睇
大戶終於搵到理由質低個市
不過，今次股災究竟係不可避免並純屬隨機發生，抑或係有人做安排好晒劇本並借機趁火打劫呢？筆者唔敢一口咬定為後者，不過，按其後唱淡嘅大行好快咁轉口風話已經拆完日圓倉，以及市場焦點又話美國經濟唔似轉差，就可以見得到大戶終於搵到個理由去質低啲科技股並嚇走啲散戶投資者。
美科技龍頭難取代
其實，今次美國啲科技股大幅度回落，最主要原因除咗話美國經濟有衰退風險外，最重要係話好多隻科技巨企包括蘋果、特斯拉、英偉達等都不約而同出咗「利淡消息」，加上大戶唱淡經濟下，一向被動嘅散戶都好似個個中咗魔咒咁拋出手上啲科技龍頭，人踩人下成個科技股市場血流成河。而股票市場一向最容易搵錢就係向下炒，因為投資者貪生怕死特性下，跌市期間都會跌得好甘，亦係做淡一方最容易搵大錢嘅時候，問題係投資者究竟能否分別出係火警演習定係真火警。
由於今次股市急跌後，新一批公布嘅美國經濟數據再度反映出美國經濟強韌，對市場上說美國經濟是「強弩之末」嘅說法不攻自破，尤其係科技股中納指「七巨頭」大部分都係全球行業龍頭，亦係擁有絕對或相對壟斷地位，更重要係未來十年內亦好難有其他市場參與者可以挑戰到佢哋地位。所以，因為佢哋季度業績未能符合市場預期，又或者新產品未能如期上市就睇淡佢哋，咪就同話中移動（941）因為季度上客量未如理想，就擔心中移動會失去內地電信業龍頭地位嘅評論一樣咁無稽。
言平
