雅虎香港財經 金融花生│推A股救經濟 人造牛有排砌（言平）
按學院派所講，要刺激某個地方經濟增長，最快捷方法莫過於利用財政政策直接派錢到居民手上，好讓居民可以利用該筆額外資金消費。當該筆開支成為其他人收入後，居民便可以繼續有收入再作下一輪消費，咁就可以引發循環式消費，推動經濟發展。除此之外，政府亦可以透過央行利用貨幣政策，透過降低借貸成本，或增加貨幣供應做成通脹，激發居民加快消費開支，同樣可以達到刺激經濟目的。兩者分別在於財政政策效果較快同埋確定性較大；至於貨幣政策則要睇多幾個因素，包括居民借咗錢後還唔還得起，甚至銀行有幾樂意增加貸款額，都會影響到貨幣政策效用。
美股外幣即時報價 多國新聞任睇
用財政政策幫自己「找數」
既然貨幣政策存有不確定性，點解美國聯儲局過去幾十年，又咁樂意去用貨幣政策嚟調節國內經濟增長？原因好簡單，利用財政政策要自己「找數」，但利用貨幣政策則會有其他人幫美國政府「找數」，因此，計數咁精嘅美國政府，會偏向以貨幣政策作為刺激經濟手段。
內地經濟走勢成關鍵
近期港股投資者對美國會否繼續減息嘅關注度已無之前咁大，事關市場更加關心內地在國慶節假前後，一連串推出更多刺激經濟措施，包括大幅降準及降存量貸款息率、又表態支持內地資本市場，更提及會發行特別國債作為推出財政政策嘅子彈。所以，港股由9月24日當內地打響咗第一發刺激經濟措施後，恒指已率先由18240點持續上升，更升破咗2023年高位22700點阻力。市場上各大行都好樂觀咁睇好中、港股市，更表示外資投資者需要將中、港股市由「低配」轉為「高配」，所以中、港股市將會出現前所未見嘅大牛市。
雖然筆者都好同意港股已進入咗資金主導牛市，至於該牛市有幾長命，都好視乎內地經濟情況有否得到改善，事關港股近年同內地A股走勢相關性高咗好多，當內地A股持續跳水，港股走勢就變成綑綁式「You Jump, I Jump」，就算外圍美股、日股，甚至台股日日創新高，港股都只係繼續攬住A股一齊進行深潛。
所以，A股如果喺今次升市中，未能重拾內地及海外投資者信心的話，對港股固然會造成極大回調壓力，更加會令到近期所推出政策功虧一簣，呢個咁簡單道理，中央一定非常明白，所以，筆者絕對相信中央政府會繼續讓A股向好，以製造更大財富效應支持多幾輪消費循環，並全力推動內地經濟返回正軌，所以，港股短期雖然會有較大波幅，但隨之而嚟嘅升幅就一定唔會小得去邊。
言平
本欄隔周四刊出
