【股壇衝鋒車】絕世筍國企（周沖）

周沖近來偏向以北水思維推介股票，發現效果不錯，例如粵海置地(124)，同方泰德(1206)及暢捷通(1588)，走勢唔係創出52周新高就係上市新高，今日推介天業節水(0840.HK)，全因這隻H股市值僅1.5億元的新疆國企有四大賣點，一旦爆發升浪，倍升不是夢。

天業主要從事節水灌溉系統及滴灌配件銷售，近幾年業績認真麻麻，盈利都係幾百萬元貨仔，不過，買股係買其前景，天業最值得憧憬係系內重組及母公司注資，對一隻市值3.6億元(H股佔1.41億，餘數為內資股)的國企股來說，只要有少許資產重組或注入催化劑，股價肯定如脫疆野馬。天業母公司為新疆天業集團，集團的控股股東為國企兵農八師，來頭實在猛。

股價折讓60%

第二，天業的姊妹公司新疆天業(600075.SS)市值41億人民幣，天業size相見形拙，同係一個阿媽出，冇理由分野咁大，只要阿媽唔偏心，把彼此差距略為收窄，方法可以係系內資產置換。近年中央大手推進國企的重組改革，本周初A股上市的新疆股備受追捧，當中新疆天業股價由今年初的6.30元人民幣起步炒到周二收市價9.36元，升幅近50%，相反天業股價年至今原地踏步，反映股價非常值博。

第三，天業大股東成本價係1.20元，現價0.74元實在值博。2011年，由於母公司變換大股東，按上市條例需向小股東提出全面收購，作價係1.20元，博股價上返大股東成本價，上升空間高達70%。

第四係天業的每股資產淨係高達1.38元人民幣，現價大幅折讓60%，即可以用4折價錢買入具實力國企，等北水南下掃貨，屬安全系數極高和潛在回報和味的投資。