【我係邪惡HR】請人成本其實唔細（HR小薯蓉）

【我係邪惡HR】請人成本其實唔細（HR小薯蓉）

最新香港失業率經季節性調整維持喺2.8%低位，企業一般都面對招聘困難問題。一啲需要特殊技能嘅職位就更加難請，好多公司不惜高薪聘請、畀高昂嘅獵頭費用，誓要請到相關人才為止。喺請人難嘅年代，留住公司嘅人才更加刻不容緩，但呢點往往都好易被忽略。以為好易喺外面請到個平靚正？其實重新請人嘅成本可能比留住一個人更加大。

1.登廣告成本

為咗收多幾份CV，好多公司都要不停喺網上或報紙出廣告請人。一個網上招聘廣告話就話可以擺一個月，但生存時間一般只有一星期左右，過咗一星期就已經被新一批廣告掩蓋，然後石沉大海。好多公司收唔到CV，被迫短期內要再出廣告，因此被誤認為「伏」工一份。有人話上網check下間公司出廣告嘅頻密程度就可以估到間公司好與壞，但其實真係唔能夠一概而論。

2.Agency費用

如果登廣告請唔到人，資源較多嘅公司會考慮用Recruitment Agency，但當然要付出較高昂嘅轉介費。工作嘅嘢始終人夾人緣，就算經Agency搵嘅，做落都唔擔保一定夾得嚟。結果就算畀了高昂費用，過了Agency嘅保證期，公司又要重新畀錢再請人。一個職位嘅招聘成本已經唔細，試想下如果有一大堆⋯⋯

3.HR人員嘅時間

當公司空缺多，HR自然要花更多時間去做招聘。HR嘅工作時間都係招聘成本嘅一部分，如果公司turnover冇咁高，HR人員可以有多啲時間去做其他策略性嘅工作，優化公司政策令員工留低，長遠可以節省請人嘅成本。相反，可能會陷入惡性循環。

4.培訓嘅成本

好多公司每年都花唔少開支喺培訓上，但如果培訓完啲員工又係咁走，基本上等於倒錢落海。當舊人離開，新人返工，同一套培訓又要重新做過，成本會因此大大增加。不過有啲公司就會本末倒置，覺得反正啲人走得快，培訓就係一種資源浪費，索性連培訓都唔做，結果令將來更難留人。

留唔住員工重新請人其實仲有好多隱藏嘅成本，下次再講。