雅虎香港財經 【異動尋寶】悶市無股炒 升市唔夠錢炒！（魏力）
「悶市無股炒，升市唔夠錢炒！」這句不知是否戰友們近期的心聲？個市連升11日，創18年最長升浪，由上月底位28100，一口氣飛近3,000點，各板塊全面上漲，遍地開花的格局，但點解都覺得難炒？
這主要有三個因素：第一，板塊輪動得太快。除咗非常貼市、心口掛著勇字的炒家之外，正常散戶見到隻股票升，通常的反應係唔會即時衝入場，「係咪堅㗎？等佢回吓先啦！」到升第二日，開始有點心動，再升多少少，終於衝入去，跟住大戶就轉去炒第二個板塊，牛市一樣即買即捱價，中伏多幾轉，仲邊有信心？
第二，都係同個market pace有關，就係走去撈啲落緊山的股票。以舜宇光學（2382）為例，最多人問呢個number，係最近一個月。無他，由150蚊碌到100蚊，跌咗三分一，覺得抵嘛！早兩日有個case：「魏Sir，想買2382，幾錢可以買？」答曰：「未有見底訊號，起碼要升穿115蚊先得。」到翌日開市，舜宇逆市又跌2蚊，魏力再收到PM message：「忍唔住104入咗。」再過一陣，得番103蚊：「應唔應該走？」請問各位，魏力該如何回應？
好股大平賣，只會出現在恐慌市，如今大牛市的情況下，2017年的股王之一居然逆市係咁插，你覺得大戶會否不理性沽低個價，邀請各位執平貨？咁跌法自然與估值太貴、增長放緩有關。同樣情況也出現在吉利汽車（175）身上。2017年銷售增長6成，今年目標只係增長2成，增長放慢，估值相對就貴了，自然要向下調整。
第三，就是忽視了過去兩年北水南下大增，玩法已經唔同咗。以前本金細細，可以炒殼價、毫子股、一兩蚊的股票，上流的機會仍有不少。但北水南來之後，由於大部份為機構投資者，買來買去都係幾十蚊以至幾百蚊一股的大股，仲要升極都係指數。閣下見龍頭升，走去買龍尾股博追落後，結果只係越來越落後。大價股越來越貴，不少散戶的倉位反而縮了水，想「棄暗投明」買大股追回報的時候，卻發現本金已經不夠了，sad but true。
「咁有乜解決方法？」其實魏力之前已多次提出，覺得大價股好貴，買唔落手的話，就應該買ETF，即係盈富（2800）或者恒生H股（2828），入場費較低之餘又跟到指數，站穩陣腳再去追回報。再堅持用以前個套炒法應戰，只係令自己提早出局而已。
筆者為證監會持牌人，未持有上述股份權益。
