【異動尋寶】泥漿摔角 博定唔博？（魏力）

政治市，炒股操作難度係十粒星，落注已經唔敢大，仲要鋪鋪搶雞糊，想博多一日，點知第二日就嘔突。舉兩個例：第一、上週初恒指由3萬點開始反彈，搵股落part，揀咗洛鉬（3993），5.9元買咗，即日升咗20格（利潤4%都無），尾市6.1元走人。如果當日唔走，執筆時個價係5.53元，倒嘔37格。

第二、上星期華電福新（816）大陽燭突破三年大橫行區，機械式衝入，順利執10格（但利潤唔夠5%），諗住個勢好，坐過夜，對唔住，第二日恒指隊600點，隻股票瞬間回到買入點，以為係震倉「後抽」，第二日再隊5%，一幅靚圖極速變「假突破」，收皮。贏一隻、輸一隻，扣埋使費，好彩的打和微利，稍一遲疑就要倒輸，你話家陣個市係泥漿摔角，絕不為過。

前日收市阿爺降準救市，恒指高開400又散水，午後靠阿爺再托市先好番啲。事關各大板塊都有自身問題，例如汽車、內房，去年基數甚高，加上又調控，又放寬外資持股比例，今年跑輸大市機會好大。手機設備、5G股方面，中興（763）停咗牌，沽唔到，唯有沽長飛光纖（6869）。中興出事後，華為都有難，舜宇（2382）、丘鈦（1478）都有接華為訂單，又被掟。

「半導體股炒起哂喎，有冇商機？」芯片股升，源於中金報告分析，美國加強禁止技術轉移（特別是芯片），這將有助加快「土炮」半導體股的發展，例如中芯（981）、華虹半導體（1347）等。這種推論雖然合乎邏輯，炒炒無妨，但是十分長遠的事，只要炒風稍為降溫，這類股份由於業績增長一般，回調速度將十大快，隨時打回原形，要炒的話，還是即日鮮好了。

筆者為證監會持牌人，未持有上述股份權益。

www.facebook.com/2012jason