大茶飯│通告玩到出神入化（青冰）

唔同公司在發通告之時，都會體現了不同的企業管治性格，而這些慣性，都會令你追揸沽之時，諗多一諗，究竟下一步應該點做。 (NurPhoto via Getty Images)

只要戰友刨得通告多，其實都不難發現，唔同公司在發通告之時，都會體現了不同的企業管治性格，而這些慣性，都會令你追揸沽之時，諗多一諗，究竟下一步應該點做。

用最簡單的例子，同是業績靚，有些公司未到半年結已經急不及待透露，佢可以在第四個月忽然話，今年這四個月已經比去年同期急增了五成，預計半年條數都會靚仔，青冰的習慣是，同比之餘，亦要跟去年那六個月比，再拎環比那六個月比較，通常比完幾次，就知道業績到底有幾好。不過有些公司就喜歡收收埋埋，即使年結完咗都唔出聲，去到出業績前幾星期先發盈喜，青冰更記得有些公司，講咗幾多號出業績都唔發盈喜，去到正式出之前幾天先發，詳細原因就唔知了，但感覺就是想同投資者作對，玩到你盡。

必瘦站回購增持打孖上

玩通告玩到出神入化的，青冰愛股必瘦站（1830）肯定是其一，早前寫過，去年全年業績後，一如以往豪派息，亦首次可以以股代息，但管理層就粒聲唔出，直至揀息截止日期後，才在10月發通告話全部以股代息，咁爆發性的消息當然可在疫情反覆時，強力地支持股價啦，之後11月時發盈警，但伴隨盈警的，就是發佈10月的經營數據，及雙十一的銷售數字，一警兩喜，即時沖淡咗個不利感覺，去年11月尾香港疫情進入第四波，美容院又再次關門，公司這幾個月就再無公佈最新經營數據了。

必瘦站股價在2月初開始轉強，起初還以為係炒放寬限聚，重開美容院，但幅度愈升愈勁，公司在上周就公佈，回購了100萬股，作價4.44元，可算係物輕情義重，當你諗唔通何解在歷史高位附近回購之時，公司昨天再發通告，指主席及財務總監1月至2月期間，共增持了約525萬股，入市位仲低過回購價，係4.33元。只要比較返當日以股代息的數量及作價，再跟現在相比，小巫見大巫也，但大股東身體就最誠實，入市買貨點都係利好嘅，但通告出得太密，市場或會吃不消，應該需要啲時間回吓氣吧。

青冰

http://www.fb.com/chingbing888

本欄逢周二刊出

【下載Yahoo財經APP】獲全球超過1700萬人信任的美股投資工具，跨平台同步你的投資組合，一APP掌握TSLA、AAPL、AMZN等美股最新走勢。