【扮工收風】Annual Dinner抽中過期雪糕券
一間吝嗇嘅公司,可以點樣搞Annual Dinner呢?又要威又冇budget威可以點做?以下就係個別嘅真實故事。
首先,喺揀場地方面,所有酒店一概唔揀,只揀地鐵沿線到唔到嘅偏遠屋邨酒樓,總之員工當日自己搵方法去到目的地啦。
第二,為咗要慳錢,唔升級任飲白酒紅酒,因為橙汁要加錢,所以都唔加,只有一圍12罐汽水,好仲慘過去食漢和。
第三,冇錢又要搞抽獎,所以只好揼部門主管心口。部門主管就將屋企唔要嘅籮底橙拎出來抽,結果出咗嚟嘅獎品,就係仲有一個月就到期嘅萬寧$500現金券(擺明係主管上年抽到但未用晒)、已過期雪糕券、一堆冇乜用嘅贈品。
最慘嘅係,有同事抽到雪糕券之後先發現過咗期,於是同返大會講。原來係搞手睇漏眼,過期都照收,但冇得上訴,無得補抽呀﹗
至最重要嘅現金獎,竟然都係周圍揼人心口而眾籌出來,啲人$100、$100咁捐,連老闆都只係捐$500,最終善款$5000,扣咗大獎嘅$2000,再拆細10份現金獎,每份$300。
有人抽到$100,班老細、主管同HR好似中層樓咁恭喜你,真係抽到都唔知值唔值得開心好。
總結係Annual Dinner搞到咁寒酸,不如唔好搞。
各位讀者,你公司又有乜出位嘢?
===================
19網輕鬆爆料熱線,歡迎舉報老細同事19惡行,立即click入去講畀我哋知啦