日本摩天輪變辦公室 當摩天輪不再幸福
一場疫情令出名刻板的日本職場都出現大變革,工作場所由辦公室轉變為家中,再擴展到商務酒店及溫泉旅館,最近連遊樂場摩天輪都成為上班族開會地方。
疫情下遊樂場成為生意變淡重災區,距離東京約45分鐘車程的讀賣樂園亦不例外,要自救諗計就想到不如將樂園變身為上班族辦公地方,於是推出樂園工作(Workation)套餐,平日入場費一位1900日圓,二人同行3600日圓,除了可以在樂園內空曠地方隨意使用wi-fi及電源開電腦工作,另一賣點係可以任搭摩天輪一粒鐘,咁就可以實現在摩天輪內工作或開會。套票更送埋樂園附近「丘之湯」入浴券,讓你工作後可以去浸個風呂鬆一鬆。
正所謂好橋唔怕抄,香港旅遊業空前低迷,旅遊景點與其等運到,倒不如學讀賣樂園般變身成為辦公空間。最現成係中環摩天輪,假如與維港遊渡輪合作,就可以推出摩天輪加維港遊辦公套票。購買套票後,可以先在摩天輪轉住工作一小時,之後再上船望住維港靚景做多兩粒鐘,望埋個黃昏景先將一天工作埋尾,都不失為寫意選擇。
講到閒置,又點少得海洋公園,海洋公園既然大搞戶外康體活動,就不如多行一步,利用公園內空曠地方,進軍商業市場,大吸商務客。除了平日Team building可以進園玩過山車,而搭建帳篷作為戶外工作間,在秋日時節到海洋公園辦公,兼且在公園內摩天巨輪開個例會,之後再探一下久違的熊貓及其他動物,又可以重拾對海洋公園的感情,對重振海洋公園品牌都大有幫助。
除了海洋公園,現時各區都有「辦公樂園」潛力,例如沙田新城市的史奴比樂園已荒廢多時,不如轉型成為史奴比的co-work之家;近月續了牌的尖咀美食車,中短期內實在難有生意,倒不如化身流動co-work,佈置成綠野仙蹤 的「糖果屋」風亦可,吸引年輕人入內辦公。
不過叫人感慨的是,在疫情推動下,任何場所都極速變身為辦公室,結果昔日代表浪漫幸福的摩天輪,在日本今時今日竟然與工作辛勞掛勾。當摩天輪不再幸福,亦預告將來上班族與工作更加難捨難離了,出到中環happy hour,你都感覺還在工作。
===============
精選資訊網站「中環街市」 臉書粉絲頁