【熱話】熱心人叫大家體諒清潔工
作為飽受風霜嘅打工仔,相信大家都好明白職業無分貴賤、己所不欲勿施於人呢類口水都講到乾嘅道理。但有時都要拎出來提醒吓大家,先至印象深刻。近日社交媒體就瘋傳以下呢張垃圾桶「愛心留言」,希望大家行多一步體諒長期被剝削嘅「長者」清潔工。
如果你平時出街有留意,都應該會發現依家好多清潔工都年紀老邁,叫做「在職老人」,但因爲食環嘅外判制度下,令好多清潔工都冇咗應有嘅勞工保障,加上因為之前政府改咗個垃圾桶設計,收細咗個桶口,令呢班清潔工被剝削之餘,仲多咗一大輪工夫要做,份工愈做愈辛苦。
所以有熱心人就特登寫咗呢段嘢,黐喺垃圾桶上面,呼籲大家易地而處,見到垃圾桶滿咗就行多幾步,將垃圾放入未滿嘅垃圾桶,如果係大型垃圾,就直接拎去垃圾站,無謂要清潔工執手尾。
此圖一出,立即引來網民大讚,覺得好有愛之餘,亦認同要關愛呢類在職老人。作為打工仔,我都好同意呢一點,但絕不包括在辦公室嘅在職老屎忽!你話係咪先!
來源:張堅庭頻道-有心人 facebook
===================
19網輕鬆爆料熱線,歡迎舉報老細同事19惡行,立即click入去講畀我哋知啦