點解Tim Cook 一條線都縮骨?
今年iPhone大家可以多一個理由邊鬧邊買,就係新iPhone取消贈送Lightning轉3.5mm耳機線,連一條線都縮骨。
從小處縮骨一直是Tim Cook的強項,往時Macbook系列都會慷慨贈送多一條長電線插頭,但新一代Macbook系列就取消了此「傳統」變相縮皮。今年iPhone故技重施,明明賣貴咗,攻頂價更首次衝破萬元大關,卻連一線條都慳返。正所謂少數怕長計,以iPhone的出貨量,減一條線就可以換來以億元計的盈利。
另一個取消送線誘因,就係這條線係近年最熱銷的iPhone配件之一。原來仲有不少人仍寧願駁線都要繼續用傳統耳機,既可能係嫌無線耳機要叉電煩,亦可能唔捨得之前買落的貴價耳機。一日有這大批用家存在,這條線就有龐大吸金力,難怪Tim Cook決定走多一步唔送線,令來年配件銷量條數更靚仔。
這條線既反映Tim Cook從小處掘金的管理功力,亦展示他為了跑數可以去到幾盡。
Apple像全盛期Nokia
近來開始有人講Apple有點像當年全盛期的Nokia,品牌有光環,新產品改少少就不愁銷量,企業規模急速膨脹。但只要Apple繼續由Tim Cook掌舵,當他留意到Apple發展見頂時,相信不會像Nokia當年般繼續自我陶醉,他未必可以像教主Steve Jobs用創新找到新藍海,但就有本事手起刀落調整公司規模,透過大縮皮延遲公司由盈轉虧的速度。如果這一天終於來到,我們或會見到Tim Cook面不改容地宣布裁員成千上萬,縮減專門店數目甚至轉型為無人店,當然如果連「Cut人」都不奏效,我們就可能見到他極速閃人,像馬雲般宣布把時間心力放在教育慈善工作吧。
相關連結:蘋果發佈會圖輯
===============
財經精選資訊網站「中環街市」 臉書粉絲頁