香港股市 已收市

「壞咗」股份大盤點

安心事件震動全城,男主角許生危機處理迅速值得一讚,更懂得拋出「我係一個壞咗嘅人」金句滿足媒體炒作需求。咁究竟在股壇中,點先算得上係「壞咗」股份。

第一類當然係最簡單定義,本來好地地,後來又忽然「壞咗」兼且一年衰過一年。安心事件女主角黃小姐所屬機構電視廣播便算係代表例子之一,曾幾何時既是本地一哥大台又係藍籌股,但經歷網上媒體衝擊、與唱片巨頭反目後,業績開始走樣,及後更被剔出藍籌股之列,唯有靠派高息留客。然而更具「壞咗」指標動作近期才出現,便是斥巨資押注星美控股債券錄得5億元減值開支,令去年業績首次見紅。星美控股早前更遭滙豐申請清盤,這筆「壞咗」投資似乎還有手尾跟,令電視廣播於短期內要扭轉「壞咗」命運更添難度。

第二類係企業本身管理質素唔差,但衰在所屬市場「壞咗」而企業轉型乏力。代表例子係另一隻過氣藍籌利豐,利豐早年透過收購成為本地採購業一哥,其供應鏈網絡管理方法更成為海外大學研究案例,但隨著電商及fast fashion崛起,中間人生意空間大幅收窄,但利豐在過去數年仍舊處於重組及轉型期,結果在2017年被剔出藍籌,要擺脫「壞咗」惡運,就要睇下由太子爺策動的數碼化平台大計未來可以有幾大吸金本事。

第三類係企業本身都燒緊錢,但勝在有遠景有概念,但上市吸水後概念始終未轉化為盈利,最後只淪為股民掉貨的「壞咗」燒錢股。昔日代表例子有曾被股民熱捧的動畫股意馬國際,未來深具潛力就首推業務燒錢連環船的美團。

正如女生找對象,一不留神就可能遇上「壞咗」渣男,散戶不幸買中「壞咗」股份,就不宜同錢鬥氣,快手斬纜尋找其他投資機回收復損失,總好過痴痴地繼續持有等運到吧。

===============

精選資訊網站「中環街市」  臉書粉絲頁