香港股市 已收市

【大茶飯】大行劈價 後知後覺(青冰)

莎莎(0178)上周剛公佈半年業績,盈利按年升85%,賺2.03億,照數字睇的確唔錯,但翌日大行全部唱淡,狠劈目標價及下調評級,如果懶啲嘅,一句好消息出貨已經解釋晒,唔需要分析,但如果回帶睇返最近半年發生過咩,再配合股價,或有更深了解。

莎莎股價在6月中見頂,高見5.92元,之後幾日公佈全年業績,盈利增長35%,仲有幾仙特別息,但股價卻無力再創新高,用當天的每股盈利計,當時是40倍市盈率。本港中小型股份在6月開始陸續見頂,大環境都係持續向下,人仔貶值、自爆的政策不斷,皆是原因,莎莎的股價在3個月內跌穿3.5元,高位累跌4成,非常驚嚇。

在這段期間,七月公佈的首季銷售數字,未見異樣,港澳區的同店銷售及營業額按年增長逾兩成;十月公佈的次季及國慶假期數據,營業額及同店銷售增長明顯放慢,只有約8%,但管理層仍然樂觀,對高鐵及港珠澳大橋通車後銷售增長有信心。不過貿易戰白熱化,港股投資氣氛極差,莎莎股價也在上月一度跌穿3蚊,低見2.90元,四個月內,股價腰斬。

上周業績後,主席郭少明罕有地看淡下半年的銷售,更指11月的消費氣氛唔理想,見到這些指引,大行自然紛紛劈價,花旗率先「沽售」,目標價2.7元,但睇返佢地5月時睇6蚊,9月時仍維持買入,其餘大行都後知後覺,但仍有些是維持買入的。

在金融市場,跟紅頂白一沉百踩,都好平常,但最幫到自己的,還是冷靜的分析,六月時40倍市盈率,算係好牛,當時大行的理據係盈利會持續增長,現在主席都話下半年一定比上半年曳,如果你覺得下半年盈利要打七折,那全年每股盈利大概是0.114,現價約27倍PE,當然你看更淡就可以再計,但下半年要蝕錢,先會貴到40倍。另一測市指標,就是個股價,上文提及這半年發生的事,唔算有太多壞消息,但反覆跌了五成,股價行先過消息,又一鐵證,現時出了壞消息,如果股價再無穿底,就要開始尊重了。接著來到的聖誕新年及農曆年假期,可以走出去感受消費氣氛,相信都總比盡信大行報告為佳。

Fb個人專頁 http://www.fb.com/chingbing888