雅虎香港財經 【大茶飯】政治令股市更難測（青冰）
上星期一恆指急升676點，事關習特會有停火協議，當天的升勢可謂非常全面，青冰當天都跑輸大市，不禁私底下同戰友呻，再咁挾法都好蝕喎，要唔要跟返啲大市相關股份呢？結果當天全日都冇做買賣。之後兩日開始炒美債息率倒掛，連市場人士最睇重的2年對10年的息差，都收窄至得返幾點子，可謂非常得人驚，嗰一刻望下隻匯控(0005)仲係68蚊，心諗又會反應咁慢嘅，點知之後三日跌四蚊，好喇到爆出華為孟晚舟被捕，中美港股市齊插，本身有90日玩就最終90小時多啲就玩完。
今年相當難玩係不爭之事實，如果是普通的牛市炒爆熊市到來，似乎還好一點，但今年加添了政治風險，更加難測，侵侵每晚的推文十足凌凌柒入面的古惑的槍，腦海即時諗到句：咁易畀你估到我就唔係食神啦，星爺再開戲應該整個影射侵侵的角色，肯定在內地爆紅。
政治市就肯定有很多偉論及分析，青冰不才真係寫唔出亦看不透，就以過去十日來說，事後評論自然係通透嘅，華為係5G頭目，要打擊佢絕對唔奇，但去到咁高層次越境引導捉人，及停火後不足一星期就出手，事前應該冇人估到喇呱，在金融市場timing就最重要，你係11月造淡定習特會後出手，已有不同的結局，所以青冰都係繼續先花生後抽水，唔會分析咁多政治。
每逢12月，總有兩個說法，一是粉飾櫥窗，另一是Tax selling，如果是尋常市況，前者多會出現，但都係以本少利大為主，些少資金又mark到價為佳，但重磅股嘅就不用妄想了；而後者則較常在美國出現，將蝕錢貨沽出變成capital loss，咁就可以減少稅務支出。Nasdaq 100指數今年仍升3.4%，但今年跌嘅股份有59隻，而跌兩成的股份更有28隻，當中唔少大家認識的中概股如攜程、網易及京東，亦有Facebook及Nvidia，未來幾周會唔會繼續挨沽甚至超跌，不妨留意。
至於港股，青冰仍然維持年底前不穿底的看法，基金到年尾一定少做少錯，唔會有大動作，即使要減倉沽貨，現階段承接力不夠，夾硬沽反令自己賬面數更差，蝕章！至於老散部署，首要就係唔好貪平撈近日破底的股，至於仍有心水股的，本著持倉而不加倉的策略，平穩過聖誕吧。
