雅虎香港財經 【大茶飯】細細粒終於轉板（青冰）
還記得十一月底在報章提及過卓珈(8358)，當日話佢哋六月頭遞交轉板申請，一般有效期是半年，換言之12月頭就到期喇，所以轉板之期不遠了。不過從那天起都沒有任何消息公佈，農曆新年前話將於今天公佈業績，那時青冰預期應該會有update吧，股價亦由1.75元忽然起步，連升四天，最高見過2.21元，之後上周五突然失驚無神宣佈，將於2月18日正式轉板。
整份通告有49頁，基本上儼如一份濃縮版的招股書，由於青冰極少吼創仔，唔知原來轉板通告係會咁詳細的，業務發展及財務數據當然會有，但每個美容中心都有仔細數字，醫生的學歷及收益，113名僱員的職能分佈都有。你話平時的業績如果做到咁詳細，的確有利投資者由零開始去研究，不過我哋都明白，過咗海就係神仙，香港上市公司即使幾細隻業務幾簡單，都唔會講太多你知，千篇一律的回顧，業績差就賴貿易戰咁囉。
49頁的鴻文最好笑係第一頁，卓珈重提6月1日遞交申請，並於12月13日獲進一步續期，最後港交所在2月8日原則性批准轉板，但點解在12月13日前後，竟無任何通告作披露呢？作為女神黎姿細細粒的fans，青冰當然唔會怪佢啦，因為過去一年睇過三幾隻創仔轉板，都係過咗期都冇通告，但又會隔個零月失驚無神再遞申請，之後神速幾星期就成功轉板，所以有理由相信，上市條例可能無講明，或者是港交所把關不力。
按通告所講，卓珈在11月中批股後，細細粒夫婦持有68.75%股權，而25名最大股東持股總和，由95%減至89.9%，而最新的資料顯示，現時公眾股東逾300人，最大三名公眾股東共持8.8%股權，這些數據亦體現在平日成交量及買賣盤數量，係好鬼乾，來來去去都是那些經紀，所以轉板消息浮面後是否爆升，相信都是事在「人」為，衝入場前真係要計好數先。
現時卓珈市值7.7億，已晉身為美容三姐，大姐係有企鵝撐的醫思醫療(2138)，二姐係有嫻妃撐的必瘦站(1830)，卓珈市值第三，但估值都唔算最平，究竟轉板後係完成任務，還是壯大板圖的第一步，真係要睇細細粒及馬家的功力了。
