雅虎香港財經 【大茶飯】論搶購 我哋係專家（青冰）
上星期五，全港市民都忙著搶購，果農就等下午三點搶新iphone，家庭主婦就更忙，要搶購未來幾天的糧水，仲要行文具店掃膠紙，怕嘅就係超強颱風山竹帶來的破壞，亦怕停電，近日再創新高的中電(0002)，亦罕有發新聞稿，話盡量維持可靠供電，事先帶定個頭盔。
作為極有效率的市場經濟體，香港人對搶購熱真係慣晒，為嘅都係想轉手即賺，較少係自身需要，子華同華仔固然受廣大港人歡迎，但如果啲黃牛消息係話炒唔起，相信應該少一半人會去搶。iphone亦係一個好例子，早幾年好景時一部執幾千，入場費低，仲可以賺埋信用卡積分，去ST沽貨又易，難怪大部分年輕人都有做過果農。
同樣的道理，套用在股市就是IPO市場，每隔幾年就會有一個主題，接近係逢抽必賺，本錢細嘅就做一手黨，識玩嘅就利用證券行提供嘅孖展優惠去抽，夠狠嘅，揀隻細股去頂頭槌，所花的精神及回報，隨時比自己的心水股更有效率。
如果要理性分析，其實以上的搶購都可能唔太合邏輯。打風怕停電，但仲掃咁多凍肉及蔬菜，唔通到時生食咩；專家話貼膠紙不會減低爆玻璃的機會，只係爆咗碎片唔會周圍飛而已；iphone去年已經玩中港同步發售，現在兩地差價只是匯水差距，水位有限，ST開價不會太進取；去年很多熱爆的IPO都係蝕住上市，青冰之前都分析過，最終能成為火鳳凰成為股王的，相信百中無一。
講到呢度，講到我地港人好似好低能咁，其實全球金融市場亦係大同小異，美股也有些明星股長期蝕錢，賣畀你嘅夢就是扭虧的憧憬，大賺只是時間問題云云，亦有龍頭股係百幾倍PE，只要繼續交到增長，暫時係冇問題，但稍一不慎，增長放緩，有眼你睇8月舜宇(2382)如何被狂洗的。不過金融市場有個好處，就是流動性相對高，要食糊要止蝕，應該唔難，iphone都尚且可以逼住自用，但掃凸咗膠紙或流心奶黃月餅，相信要一段頗長時間，先消化得到了。
