雅虎香港財經 【大茶飯】貿易戰的贏家（青冰）
當貿易戰未正式開波時，大家都只當侵侵係另一口水演出，相信甚少人估得到，原來對環球市場的影響係咁大，即使在上月初開始聞到有火藥味，大家都只會提醒避開美國經濟股，創科(0669)及利豐(0494)應該首當其衝吧，不過到真係埋牙之時，原來兩國揀的目標亦非常到肉。
美國先拋出的方案，目標主要係高科技產品，包括航天、信息及通信技術及機械人等行業，雖然話就話高科技，但相信各戰友都了解，真正的高科技，點會由中國入口吖，講緊嘅都係零部件等等，青冰相信手機係最大的要點，華為在美國發展一直受制，話會帶來國家安全威脅，今次徵稅來得順理成章。
華為冇在中港美上市，未能在股價上反映，不過大家可以留意佢嘅供應商的表現，在台上市的大立光，係華為Mate10的鏡頭供應商，本身亦有另一大客蘋果，就咁將兩大手機同貿易戰聯想起來，都知道不妙了，股價亦由上月中開始累跌25%，而做開華為中低檔手機鏡頭的丘鈦(1478)，近日走勢也明顯比以三星為主要客戶的舜宇(2382)為差，至於關唔關貿易戰事，可自行解讀。
阿爺今次還手都算狠，目標放在汽車及飛機，兩者作為美國工業的命脈，極為重要，亦影響侵侵最怕的就業問題，去年道指升咗4956點，有988點就係由波音貢獻的，所以阿爺認真識揀，就業及指數一齊打。
揀汽車就可能有更深層的意義，你地Tesla想黎內地設廠，都係想儘快打入中國市場，減低成本同內地車競爭，如果貿易戰係真打，美國車一定大受影響，而內地車廠梗係拍手叫好啦，包括吉利(0175)在內，當然，一向崇洋的人，唔買美國車都唔一定揀本地薑，咪買歐洲車囉，Benz的母公司戴姆勒，應該亦會受惠，而又咁啱，吉利正是持有近一成的戴姆勒股份，似乎只要落實關稅，吉利必然會受惠。
吉利董事長李書福同最高領導人關係密切，都唔係新鮮事，所以整件事又變得有趣！如果貿易戰再玩大啲，青冰會去再search下仲有冇嫡系行業，咁呢個就可能會是下一個清單的目標了。
Fb個人專頁 http://www.fb.com/chingbing888
