【大茶飯】輪場如賭場(青冰)
就咁睇個標題,可能會覺得係廢話,買得窩輪及牛熊證,梗係當自己入賭場啦,唔通諗住長線投資咩?青冰一向不認同將這些衍生工具妖魔化,只要你運用得宜,懂得當中利弊,一樣可以耍出真功夫,不過本文不是教功夫,而是講下「賭場」生態。
記得N年前的電影賭場大亨,戲中劉德華(即係新哥)好謙虛咁話,自己唔識賭錢,現實裡在賭場做莊,唔一定需要超高賭術,最緊要係客似雲來,絕大部分的賭局,本身的機率設計都係對莊家有利,所以長賭必輸也不是衛道的說話,如果戰友有興趣,可以去google一下Robert Hannum的A Guide to Casino Mathematics,青冰沒能力班門弄斧。
青冰早前在其他文章說過,大家炒衍生工具,其實係買貴野,同一樣的東西,在場內及場外期權,可能賣一蚊,但當你落輪場掃,其實係1.20/1.30甚至1.50,對於沒法子看這些數據的散戶而言,無知可能是福,最緊要睇啱方向有錢贏,最後輪商縮引伸令你賺少咗甚至輸錢,就係由1.30縮番去1.10,你咪當賭場抽水囉,百家樂買莊贏錢都係賠0.95之嘛。
另一個輪場似賭場的特質,就係中介人,大家稱之為疊碼仔。在澳門,這些中介人係負責搵大客去貴賓廳賭,當中仲有好多服務嘅,資金進出及借貸等等,戰友可以睇下那些已上市的賭股,基本上貴賓廳佔整個賭場的9成投注額,而收入亦約佔七成。青冰你呃人,輪場邊有呢啲中介人呀?Sorry,係有的,做市場推廣的team,本身都同唔少有錢炒鬼有聯繫,唔係點會出現成隻輪100%貨在一兩日內被掃清呢?仲要係大手上板喎,你估內地人真係求其在網上search完就去市場掃咩。
澳門賭場都會做唔少優惠吸引散客,金沙(1928)算係幾成功的,你睇佢地在賭業最低潮時股價最強,就係因為中場(散客)收入一直佔5成,相比其他賭場,佢地受打貪的影響會相對少。輪商鋪天蓋地的廣告你一定見過,現在更加會包起個網上節目軟性銷售,最弊就係有些表面上不是贊助但就係咁俾冧把你炒,背後是怎樣青冰真的不憧了,但你懂的。
還有一個有趣的現象,大家似乎較難發現有人開班教賭廿一點及百家樂,不過教你炒輪致富的課程就極多,係前者太難定後者太易,就留待戰友自己演繹吧。